សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាបានថ្លែងថា ការធ្វើវិសោធនកម្មច្បាប់ស្ដីការបោះឆ្នោត គឺដើម្បីរឹតបន្តឹងជាមួយនឹងសកម្មភាពបំផ្លាញ សិទ្ធិរបស់ប្រជាពលរដ្ឋ និងពង្រឹងការទទួលខុសត្រូវរបស់មន្ត្រីនយោបាយ ហើយដែលកន្លងទៅគណៈកម្មាធិការជាតិរៀបចំការបោះឆ្នោត បានមានប្រតិកម្មទៅលើយុទ្ធនាការ ដែលថា «ខ្ញុំមិនទៅបោះឆ្នោត ដោយសារគ្មានឈ្មោះគណបក្សដែលខ្ញុំពេញចិត្ត»។
ក្នុងឱកាសអញ្ជើញចូលរួមសម្រាប់ថ្ងៃទីពីរនៃការចុះជួបសំណេះសំណាលជាមួយកម្មករ កម្មការិនីប្រមាណជិត២ម៉ឺននាក់ នៅតំបន់ព្រៃស្ពឺ មកពីរោងចក្រ សហគ្រាសចំនួន៩ នៅខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី១៤ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានបង្ហាញនូវពង្រាងដែលត្រូវធ្វើវិសោធនកម្មច្បាប់បោះឆ្នោត នៅចំណុចអ្នកដែលមានសិទ្ធិ ឈរឈ្មោះឱ្យគេបោះឆ្នោត ដែលក្នុងនោះបានចែងថា បានអនុវត្តន៍នូវសិទ្ធិបោះឆ្នោត ដោយបានបោះឆ្នោត សម្រាប់ការបោះឆ្នោតជាសកលចំនួនពីរដង លើកចុងក្រោយជាប់គ្នា ដោយរៀបចំដោយគណៈកម្មាធិការជាតិរៀបចំការបោះឆ្នោត លើកលែងតែករណីដែលមិនអាចអនុវត្តន៍នូវសិទ្ធិបោះឆ្នោត ដោយមានមូលហេតុសមស្រប។ សម្ដេចតេជោបានបង្ហាញជាបណ្ដោះអាសន្ន នូវពង្រាងច្បាប់ជាការផាកពិន័យផងដែរ ចំពោះមាត្រាទី១៤២ថ្មី ដែលបានចែងថា ត្រូវផាកជាប្រាក់ពិន័យចំនួន ៥លានរៀល ទៅ២០លានរៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត រារាំង ឬញោះញុងប្រជាពលរដ្ឋដែលមានសិទ្ធិបោះឆ្នោត មិនឱ្យទៅចុះឈ្មោះបោះឆ្នោត ឬរារាំងមិនឱ្យចុះឈ្មោះប្រជាពលរដ្ឋដែលមានសិទ្ធិបោះឆ្នោត ក្នុងបញ្ជីបោះឆ្នោត និងសៀវភៅបញ្ជីបោះឆ្នោត។ ទន្ទឹមនេះ បង្កការអុកឡុក ឬរារាំងសកម្មភាពជាប្រក្រតី ក្នុងទីកន្លែងសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅក្នុងអំឡុងពេលនៃការជម្រះបញ្ជី និងចុះឈ្មោះបោះឆ្នោត។
ការផ្ដល់ឱ្យអ្នកគាំទ្រ ឬអ្នកបោះឆ្នោត ប្រព្រឹត្តអំពើរំលោភបំពានអំពើគំរាមកំហែង អំពើហិង្សាទៅលើបេក្ខជន ឬទៅលើគណបក្សនយោបាយដទៃ។ រារាំង ឬញោះញុងប្រជាពលរដ្ឋដែលមានសិទ្ធិបោះឆ្នោត មិនឱ្យទៅបោះឆ្នោត។ រារាំងបេក្ខជន ឬអ្នកគាំទ្រគណបក្សនយោបាយ មិនឱ្យឃោសនាបោះឆ្នោត តាមការកំណត់ ធ្វើឱ្យបាត់ទំនុកចិត្តលើការសម្រចនៃការបោះឆ្នោត ធ្វើឱ្យមានការភ័ន្តច្រឡំនាំឱ្យបាត់ទំនុកចិត្តលើការបោះឆ្នោត។ បង្កការរំខានកុំឱ្យដំណើរការបោះឆ្នោតបាន បង្កការរំខានមិនឱ្យរាប់សន្លឹកឆ្នោតបាន ធ្វើឱ្យខូចរបៀបរៀបរយក្នុងការបោះឆ្នោត ទិញសន្លឹកឆ្នោតដោយសម្ភារ ឬដោយប្រាក់កាស។ ត្រូវលុបឈ្មោះចេញពីបញ្ជីបោះឆ្នោត ឬលុបបេក្ខភាពរបស់សាម៉ីខ្លួន ឬដកសិទ្ធិឈរឈ្មោះឱ្យគេបោះឆ្នោតរបស់សាម៉ីខ្លួន សម្រាប់រយៈពេល៥ឆ្នាំយ៉ាងតិច ដោយគណៈកម្មាធិការជាតិរៀបចំការបោះឆ្នោត។ បន្ថែមលើកឋាខ័ណ្ឌដែលបានចែក្នុងកឋាខ័ណ្ឌ ១ ខាងលើ ចំពោះជនដែលបានប្រព្រឹត្តិបទល្មើសណាមួយដូចមានចែងក្នុងកឋាខ័ណ្ឌទី១ខាងលើ។
សម្ដេចតេជោក៏ថ្លែងឱ្យដឹងទៀតថា ចំពោះមាត្រា១៤៣ថ្មី ត្រូវលុបបេក្ខភាពឈរឈ្មោះបោះឆ្នោតរបស់គណបក្សនយោបាយ ឬត្រូវផាកពីន័យជាប្រាក់ពី១០លានរៀល ទៅ៣០លានរៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតពីទោសព្រហ្មទណ្ឌដទៃទៀត ចំពោះគណបក្សនយោបាយដែលបានប្រព្រឹត្តិល្មើស ដូចមានចែងក្នុងមាត្រា ១៤២ថ្មីខាងលើ៕
ប្រភព៖ ក្រសួងព័ត៌មាន