​លោក វូឡូឌីមៀ ហ្សេលេនស្គី គូសបញ្ជាក់ថា អ៊ុយក្រែននឹងទទួលបានកញ្ចប់ជំនួយយោធាដ៏ធំបំផុត ដែលមិនធ្លាប់មានពីចក្រភពអង់គ្លេស

ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បាននិយាយថា ប្រទេសអ៊ុយក្រែននឹងទទួលបានកញ្ចប់ជំនួយយោធាដ៏ធំបំផុតមិនធ្លាប់មានពីចក្រភពអង់គ្លេស ដែលមានតម្លៃ ៥០០លានផោន (៦១៩លានដុល្លារអាម៉េរិក) ។

លោកបាននិយាយនៅលើបណ្ដាញសង្គមតេឡេក្រាម បន្ទាប់ពីការសន្ទនាតាមទូរស័ព្ទជាមួយនាយករដ្ឋមន្រ្តីអង់គ្លេស លោក រីស៊ី ស៊ូណាក់ (Rishi Sunak) ថា ក្នុងកញ្ចប់នេះនឹងមានផ្ទុកមីស៊ីលស្រមោលព្យុះ និងប្រភេទមីស៊ីលផ្សេងទៀត រថពាសដែករាប់រយគ្រឿង និងយន្តហោះក្នុងទឹក និងគ្រាប់រំសេវ។

លោក ហ្សេលេនស្គី បាននិយាយថា ពួកគេក៏បានពិភាក្សាអំពីកិច្ចសហប្រតិបត្តិការការពារជាតិទ្វេភាគី ដោយផ្តោតលើសមត្ថភាពដែនសមុទ្រ និងរយៈចម្ងាយឆ្ងាយ។

យោងតាមសភាចក្រភពអង់គ្លេសបានឱ្យដឹងថា មួយក្នុងចំណោមម្ចាស់ជំនួយឈានមុខគេដល់ប្រទេសអ៊ុយក្រែន ចក្រភពអង់គ្លេសបានសន្យាផ្តល់ជំនួយជិត ១២ប៊ីលានផោនដល់ប្រទេសអ៊ុយក្រែន ចាប់តាំងពីខែកុម្ភៈ ឆ្នាំ២០២២ ដែលក្នុងនោះ ៧.១ប៊ីលាន គឺសម្រាប់ជំនួយយោធា៕

ប្រភព៖ ក្រសួងព័ត៌មាន