ទិន្នន័យបានបង្ហាញកាលពីថ្ងៃព្រហស្បតិ៍ថា ការនាំចេញរបស់ប្រទេសកូរ៉េខាងត្បូងបានកើនឡើង ៥,៨% ធៀបនឹងឆ្នាំមុនក្នុងខែនេះ ដែលជាតម្រូវការចាំបាច់ចំពោះសកលលោកសម្រាប់ឧបករណ៍អេឡិចត្រូនិក និងនាវា។
យោងតាមទិន្នន័យពីសេវាគយកូរ៉េខាងត្បូង បានឱ្យដឹងថា ការនាំចេញទៅក្រៅប្រទេសបានឈានដល់ ៣៥,៦ប៊ីលានដុល្លារអាម៉េរិកក្នុងខែវិច្ឆិកា ធៀបនឹងចំនួន ៣៣,៨ប៊ីលានដុល្លារអាម៉េរិកកាលពីឆ្នាំមុន។ ការនាំចេញគ្រឿងអេឡិចត្រូនិកមានចំនួន ២១,៦% នៃការនាំចេញសរុបរបស់ប្រទេសបានកើនឡើង ៥,៦% ធៀបនឹងឆ្នាំមុន ចំពេលដែលវិស័យឧស្សាហកម្មកើនឡើង។
ការលក់នាវាបានកើនឡើង ៧៧,១% ពីឆ្នាំមុនដល់ ១,១៣ប៊ីលានដុល្លារអាម៉េរិក ហើយការនាំចេញផលិតផលដែកថែបទៅក្រៅប្រទេសបានកើនឡើង ១១,១% កាលពីឆ្នាំមុនដល់ ២,៤៨ប៊ីលានដុល្លារ អាម៉េរិក។ ទោះជាយ៉ាងណាក៏ដោយ ការនាំចេញរថយន្តបានធ្លាក់ចុះ ១៧,៧% ធៀបនឹងឆ្នាំមុន មកនៅត្រឹម ៣,០១ប៊ីលានដុល្លារអាម៉េរិក ហើយគ្រឿងបន្លាស់រថយន្តបានធ្លាក់ចុះ ០,៣% មកត្រឹម ១,១៤ប៊ីលានដុល្លារអាម៉េរិក។
ការនាំចេញផលិតផលប្រេងក៏ធ្លាក់ចុះ ១០,៤% ផងដែរក្នុងមួយឆ្នាំមកនៅត្រឹម ២,៦៦ប៊ីលានដុល្លារអាម៉េរិក។ លោក ចូ អ៊ីកណូ (Cho Ik-no) មន្ត្រីក្រសួងឧស្សាហកម្មបាននិយាយថា «ការនាំចេញបានកើនឡើងបើធៀបនឹងរយៈពេលដូចគ្នាកាលពីឆ្នាំមុន ដែលជំរុញដោយដំណើរការដ៏រឹងមាំនៅទូទាំងវិស័យសំខាន់ៗដូចជា គ្រឿងអេឡិចត្រូនិក នាវា និងដែកថែប» លោកបានបន្ថែមថា ប្រទេសនេះត្រូវបានគេរំពឹងថានឹងរក្សាបាននូវកំណើនការនាំចេញរយៈពេល ១៤ខែរបស់ខ្លួន និងអតិរេកពាណិជ្ជកម្មរយៈពេល ១៨ខែនៅក្នុងខែវិច្ឆិកា៕
ប្រភព៖ ក្រសួងព័ត៌មាន