ទស្សនវិស័យសេដ្ឋកិច្ចក្នុងតំបន់៖ អាស៊ានបន្តមើលឃើញពីសញ្ញានៃការងើបឡើងវិញ ខណៈប្រទេសជាសមាជិកអាស៊ានបានបើកដំណើរការសេដ្ឋកិច្ចឡើងវិញបន្តិចម្តងៗ។ ក្នុងត្រីមាសទី១ នៃឆ្នាំ២០២១ បានបង្ហាញពីកំណើននៃពាណិជ្ជកម្មនាំចេញ និងការវិនិយោគពីបរទេស ដែលជំរុញដោយវិស័យ សំខាន់ចំពោះការឆ្លើយតបនឹងជំងឺរាតត្បាតដូចជាកៅស៊ូនិងឧស្សាហកម្មវេជ្ជសាស្ត្រ ក៏ដូចជារថយន្ត ដែក និងដែកថែប។ កំណើននៃផលិតភាពផលិតកម្មទូទាំងតំបន់ក៏បានបង្ហាញពីការវិលត្រឡប់។ សេដ្ឋកិច្ចរបស់អាស៊ាន ត្រូវបានរំពឹងថានឹងមានកំណើន ៤% ក្នុងឆ្នាំនេះ និង ៥.២% ក្នុងឆ្នាំក្រោយ។ បើទោះបីជាការងើបឡើងវិញនៅតែផុយស្រួយដោយវ៉ារ្យ៉ង់ថ្មីនៃវីរុសកូវីដ-១៩ បានបង្កឲ្យមានការរឹតបន្តឹងជាថ្មី ដែលបន្ថែមលើភាពមិនប្រាកដប្រជា និងគំរាមកំហែងដល់ការវិលត្រឡប់នៃសេដ្ឋកិច្ច។ ការចាក់វ៉ាក់សាំង នៅតែអាទិភាពដើម្បីការពារប្រជាជន និងបង្កើតនូវបរិយាកាសដែលមានសុវត្ថិភាពសម្រាប់ការបង្កើតដំណើារការឡើងវិញ និងលើកលែងបម្រាមគោចរនិងការបិទព្រំដែន។