អេហ្ស៊ីប និងហ្ស៊កដានី អំពាវនាវឱ្យគាំទ្រអធិបតេយ្យភាព និងឯកភាពស៊ីរី

រដ្ឋមន្ត្រីការបរទេសអេហ្ស៊ីប លោក បាដឺ អាប់ដេលឡាតទី (Badr Abdelatty) និងសមភាគីហ្សកដានី លោក អាយម៉ាន សាហ្វាឌី (Ayman Safadi) បានសង្កត់ធ្ងន់ពីសារៈសំខាន់នៃការគាំទ្រ និងគោរពអធិបតេយ្យភាព ឯកភាព និងបូរណភាពទឹកដី ស៊ីរី។

យោងតាមសេចក្តីថ្លែងការណ៍របស់ក្រសួងការបរទេសអេហ្ស៊ីប បានឱ្យដឹងថា ក្នុងអំឡុងពេលសន្ទនាតាមទូរស័ព្ទ ពួកគេបានលើកឡើងពីតម្រូវការសម្រាប់ការពង្រឹងការសម្របសម្រួលរវាងមន្រ្ដីក្នុងតំបន់ និងអន្តរជាតិ ដើម្បីគាំទ្រដល់កិច្ចខិតខំប្រឹងប្រែងកសាងឡើងវិញរបស់ប្រទេសស៊ីរី។

រដ្ឋមន្ត្រីទាំងពីរក៏បានពិនិត្យមើលការវិវឌ្ឍចុងក្រោយបង្អស់នៅក្នុងប្រទេសស៊ីរីផងដែរ ដោយរដ្ឋមន្ត្រីការបរទេសហ្ស៊កដានីបានធ្វើការសន្ទនាជាមួយសមភាគីអេហ្ស៊ីបអំពីលទ្ធផលនៃដំណើរទស្សនកិច្ចរបស់លោកទៅកាន់ប្រទេសស៊ីរីកាលពីព្រឹកមិញ។ កាលពីថ្ងៃចន្ទ លោក សាហ្វាឌី បានជួបពិភាក្សាជាមួយ លោក អាហ៍មេដ អាល់សារ៉ា (Ahmed al-Sharaa) ប្រធានក្រុមគ្រប់គ្រងការពិតរបស់ប្រទេសស៊ីរី នៅក្នុងទីក្រុងដាម៉ាស់ ដោយផ្តោតលើការផ្លាស់ប្តូរនយោបាយរបស់ប្រទេសស៊ីរី និងកង្វល់សន្តិសុខក្នុងតំបន់កាន់តែទូលំទូលាយ។

យោងតាមប្រព័ន្ធផ្សព្វផ្សាយស៊ីរី Sham FM បានរាយការណ៍ថា លោក សាហ្វាឌី បានរំលឹកឡើងវិញនូវការប្តេជ្ញាចិត្តរបស់ប្រទេសហ្ស៊កដានីក្នុងការជួយដល់កិច្ចខិតខំប្រឹងប្រែងកសាងឡើងវិញរបស់ប្រទេសស៊ីរី ដោយលោកបានសង្កត់ធ្ងន់ថា ប្រទេសហ្ស៊កដានីនឹងលើកទឹកចិត្តទាំងដៃគូក្នុងតំបន់ និងអន្តរជាតិឱ្យចូលរួមជាមួយភាពជាអ្នកដឹកនាំដែលកំពុងរីកចម្រើនរបស់ប្រទេស ស៊ីរី៕

ប្រភព៖ ក្រសួងព័ត៌មាន