ប្រធានាធិបតីចិន លោក ស៊ី ជីនពីង (Xi Jinping) បានជួបជាមួយនាយករដ្ឋមន្ត្រីម៉ុងហ្គោលី លោក លូវសានណាំស្រៃ អូយ៉ុន អ៊ឺដេណេ (Luvsannamsrai Oyun-Erdene) នៅទីក្រុងប៉េកាំង កាលពីថ្ងៃអង្គារ ដោយអំពាវនាវឱ្យពង្រឹងការតភ្ជាប់ទំនាក់ទំនង និងធ្វើឱ្យកាន់តែស៊ីជម្រៅនូវមិត្តភាព ការជឿទុកចិត្តគ្នា និងកិច្ចសហប្រតិបត្តិការរវាងចិន និងម៉ុងហ្គោលី។
ដោយកត់សម្គាល់ប្រទេសទាំងពីរគឺជាអ្នកជិតខាងដែលតភ្ជាប់ដោយភ្នំ និងទន្លេ លោក ស៊ី បានចង្អុលបង្ហាញថា ការអភិវឌ្ឍនៃភាពជាអ្នកជិតខាងល្អយូរអង្វែង គឺជាជម្រើសយុទ្ធសាស្ត្រដែលធ្វើឡើងដោយភាគីទាំងពីរ ដែលអនុលោមភាពពេញលេញទៅនឹងផលប្រយោជន៍ជាមូលដ្ឋានរបស់ប្រជាជនទាំងពីរ។ លោក ស៊ី បាននិយាយថា ប្រទេសចិនដែលជាដៃគូដ៏គួរឱ្យទុកចិត្ត និងមានទំនុកចិត្តសម្រាប់ម៉ុងហ្គោលី បានយកចិត្តទុកដាក់យ៉ាងខ្លាំងចំពោះការអភិវឌ្ឍនៃទំនាក់ទំនងរវាងចិន-ម៉ុងហ្គោលី។
ប្រទេសចិនបានដើរតួនាទីយ៉ាងសកម្មក្នុងអភិបាលកិច្ចបរិស្ថានពិភពលោក ហើយត្រៀមខ្លួនរួចជាស្រេចក្នុងការសហការជាមួយម៉ុងហ្គោលីក្នុងការទប់ស្កាត់ និងគ្រប់គ្រងវាលខ្សាច់ ហើយនឹងបន្តគាំទ្រយុទ្ធនាការដាំដើមឈើរបស់ប្រទេសម៉ុងហ្គោលីដែលមានឈ្មោះថា «ដើមឈើពាន់លាន» ដោយបាននិយាយបន្ថែមថា ប្រទេសចិនមានឆន្ទៈក្នុងការធ្វើឱ្យប្រសើរឡើងនូវការផ្លាស់ប្តូរអន្តរភាគី និងជំរុញការផ្លាស់ប្តូរបទពិសោធន៍ក្នុងការគ្រប់គ្រងរដ្ឋជាមួយម៉ុងហ្គោលី។
លោក អូយ៉ុន អឺដេណេ បាននិយាយថា ប្រទេសម៉ុងហ្គោលី និងចិនមានអនាគតរួមគ្នា ហើយបេះដូងរបស់អ្នកទាំងពីរមានទំនាក់ទំនងគ្នា។ លោកបានកោតសរសើរចំពោះការធ្វើជាម្ចាស់ផ្ទះដោយជោគជ័យនៃព្រឹត្តិការណ៍កីឡាអូឡាំពិករដូវរងាចំពេលដែលមានការរាតត្បាតនៃជំងឺកូវីដ១៩ ដោយលោកបានបន្ថែមថា វាបានបង្ហាញពីសាមគ្គីភាព និងកិច្ចសហប្រតិបត្តិការ និងបង្កើនទំនុកចិត្តរបស់សហគមន៍អន្តរជាតិ។
លោក អូយ៉ុន អឺដេណេ បាននិយាយថា ប្រទេសម៉ុងហ្គោលីមានឆន្ទៈក្នុងការធ្វើការងារជាមួយប្រទេសចិនក្នុងការធ្វើឱ្យទំនាក់ទំនងរវាងម៉ុងហ្គោលី-ចិនក្លាយជាគំរូសម្រាប់ទំនាក់ទំនងរវាងប្រទេសនានា។ លោកបានសន្យាថា ប្រទេសម៉ុងហ្គោលីប្រកាន់ខ្ជាប់នូវគោលការណ៍ចិនតែមួយ គាំទ្រគោលជំហររបស់ចិនចំពោះបញ្ហាកោះតៃវ៉ាន់ ទីបេ និងខេត្តស៊ីនជាំង ក៏ដូចជាគំនិតផ្តួចផ្តើមអភិវឌ្ឍជាសកលដែលស្នើឡើងដោយចិន គំនិតផ្តួចផ្តើមសន្តិសុខជាសកល និងគំនិតផ្តួចផ្តើមអរិយធម៌ជាសកល៕
ប្រភព៖ ក្រសួងព័ត៌មាន
