ការលើកកម្ពស់ផលិតផល ក្នុងស្រុក ជាការរួមចំណែកដល់ការអភិវឌ្ឍន៍និងការរីកចម្រើននៃសង្គមជាតិ
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឱ្យដឹងថា ការលើកកម្ពស់ផលិតផលក្នុងស្រុក ជាការរួមចំណែកដល់ការអភិវឌ្ឍន៍និងការរីកចម្រើននៃសង្គមជាតិ ដើម្បីធានាកសាងសមត្ថភាពសម្រាប់ការអភិវឌ្ឍន៍សេដ្ឋកិច្ចជាតិ ប្រកបដោយចីរភាព។ តាមសារលិខិត អបអរសាទរទិវាជាតិលើកកម្ពស់ការប្រើប្រាស់ផលិតផលខ្មែរ ៩ មេសា លើកទី៥ ឆ្នាំ២០២២ ក្រោមប្រធានបទ គាំទ្រផលិតផលខ្មែរ គឺថែរក្សាសេដ្ឋកិច្ចជាតិ សម្តេចតេជោ ហ៊ុន សែន បានមានប្រសាសន៍ថា ការលើកយកប្រធានបទដ៏មានសារៈសំខាន់នេះ ដើម្បីបំផុសនិងលើកទឹកចិត្តបងប្អូនជន រួមជាតិទាំងអស់ឱ្យគាំទ្រនិងយកចិត្តទុកដាក់ក្នុងការលើកកម្ពស់ ផលិតផលក្នុងស្រុក ដែលជាការរួមចំណែកដល់ការអភិវឌ្ឍន៍និងការរីកចម្រើននៃសង្គមជាតិយើង ជាពិសេសក្នុងបរិបទបច្ចុប្បន្នដែលព្រះរាជាណាចក្រកម្ពុជា ក៏ដូចជាពិភពលោកទាំងមូលកំពុងតែប្រយុទ្ធប្រឆាំងនិងទប់ស្កាត់ការរីករាលដាលនៃជំងឺកូវីដ-១៩ ។ សម្តេចតេជោ បានបន្តថា ការចូលរួមទប់ស្កាត់ការឆ្លងរាលដាលជំងឺកូវីដ-១៩ អស់រយៈពេលពីរឆ្នាំកន្លងមក ដែលទិវាជាតិលើកកម្ពស់ការប្រើប្រាស់ផលិតផលខ្មែរ ៩ មេសា លើកទី៥ ឆ្នាំ២០២២ មិនបានរៀបចំព្រឹត្តិការណ៍នេះដោយផ្ទាល់នៅតាមទីសាធារណៈនានានៅក្នុងព្រះរាជាណាចក្រកម្ពុជា ដើម្បីប្រជាពលរដ្ឋយើងនិងភ្ញៀវបរទេសដែលរស់នៅឬកំពុងធ្វើទេសចរណ៍នៅកម្ពុជា បានឃើញ ពីភាពសម្បូរបែបនៃផលិតផលខ្មែរ ទាំងសិប្បកម្ម កសិកម្ម វត្ថុអនុស្សាវរីយ៍ សម្លៀកបំពាក់ អាហារ ភេសជ្ជៈ និងគ្រឿងសង្ហារិម។ល។ ប៉ុន្តែការបន្តរំលឹកទិវាជាតិលើកកម្ពស់ការប្រើប្រាស់ផលិតផលខ្មែរដ៏មានសារៈសំខាន់នេះ បានដើរតួនាទីជួយដល់ផលិតករក្នុងស្រុកឱ្យគិតគូរកែច្នៃផលិតផលរបស់ខ្លួនក្នុងការលើកកម្ពស់គុណតម្លៃបន្ថែមនៃផលិតផលខ្មែរ ការពង្រឹងគុណភាព សុវត្ថិភាពផលិតផល ការវេចខ្ចប់ប្រកបដោយសោភ័ណភាព និងតម្លៃ សមស្របដើម្បីចូលរួមប្រកួតប្រជែងក្នុងទីផ្សារទាំងក្នុងប្រទេសនិងក្រៅប្រទេស។ សម្តេចតេជោ បានបន្តទៀតថា ឈរលើសមិទ្ធផលនានាជាច្រើនដែលរាជរដ្ឋាភិបាលកម្ពុជាសម្រេចបានក្រោមម្លប់នៃសន្តិភាព បានធ្វើឱ្យសេដ្ឋកិច្ចមានកំណើនជាមធ្យមប្រចាំឆ្នាំក្នុងរង្វង់ ៧,៧% ក្នុងរយៈពេលជាង២ទសវត្សរ៍ចុងក្រោយនេះ ព្រមទាំង សម្រេចបាននូវបង្គោលចរជាប្រវត្តិសាស្ត្រ គឺ ឆ្លងពីឋានៈជាប្រទេសដែលមាន ចំណូលទាបទៅជាប្រទេសមាន ចំណូលមធ្យមកម្រិតទាបជាផ្លូវការកាលពីឆ្នាំ២០១៥ ជាមួយនឹងការខិតខំប្រឹងប្រែងបន្តទៀត ដើម្បីក្លាយជា ប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។ រាជរដ្ឋាភិបាល កម្ពុជាបានពង្រីកមូលដ្ឋានផលិតកម្ម កសាងហេដ្ឋារចនាសម្ព័ន្ធ កែលម្អប្រព័ន្ធដឹកជញ្ជូន និងប្រព័ន្ធឡូជីស្ទិក ទាំងផ្នែកទន់និងផ្នែករឹង លើកកម្ពស់កិច្ចសម្រួលពាណិជ្ជកម្ម កាត់បន្ថយថ្លៃអគ្គិសនី បណ្តុះបណ្តាលជំនាញទាំង ផ្នែករឹងនិងផ្នែកទន់ រៀបចំប្រព័ន្ធបច្ចេកវិទ្យាព័ត៌មាននិងឌីជីថល ជាមួយនឹងការកែទម្រង់វិស័យហិរញ្ញវត្ថុនិង វិស័យអាទិភាពផ្សេងទៀត ដែលទាំងអស់នេះគឺជាលក្ខខណ្ឌអាទិភាពដ៏ទូលំទូលាយ និងជាសក្តានុពលប្រកប ដោយគុណភាព និងតម្លាភាព សម្រាប់ទាក់ទាញការវិនិយោគនៅព្រះរាជាណាចក្រកម្ពុជា៕
ប្រទេសអាមរិចបានលក់ F-16 ចំនួន៨គ្រឿងទៅឲប្រទេសប៊ុលហ្ការី
ក្រសួងការបរទេសអាមេរិក ទើបតែបានអនុម័តគម្រោងលក់យន្តហោះចម្បាំង F-16 ចំនួន៨គ្រឿង រួមនិងបរិក្ខារពាក់ព័ន្ធ ឱ្យទៅប្រទេសប៊ុលហ្ការី ក្នុងតម្លៃ១.៦៧ពាន់លានដុល្លារ។
ក្រុមមន្រ្តីអាមេរិកបាននិយាយថា ការលក់សព្វាវុធនេះ មិនមែនទាក់ទងដោយផ្ទាល់ទៅនឹង ការឈ្លានពានរបស់រុស្ស៉ីលើអ៊ុយក្រែន ដែលបានជំរុញឱ្យរដ្ឋាភិបាលទីក្រុងកៀន ស្នើទៅកាន់បណ្តាប្រទេសអឺរ៉ុប ដែលមានយន្តហោះចម្បាំងសូវៀត MiG ក្នុងនោះរួមមានទាំងប៊ុលហ្ការីផងដែរ ឱ្យជួយប្រគល់ពួកវាទៅឱ្យខ្លួន ដើម្បីប្រើប្រាស់ក្នុងការប្រយុទ្ធជាមួយកងទ័ពរុស្ស៉ីឡើយ។ បើតាមផែនការកន្លងមក សម្រាប់ប្រទេសដែលជួយប្រគល់យន្តហោះ MiG ទាំងនោះ ឱ្យអ៊ុយក្រែន នឹងត្រូវសហរដ្ឋអាមេរិកផ្តល់យន្តហោះ F-16 ឱ្យជំនួសវិញ។
គួរបញ្ជាក់ថា យោងតាមក្រសួងការពារជាតិអាមេរិក ការស្នើរបស់ប៊ុលហ្ការី រួមមានការទិញយន្តហោះចម្បាំង F-16 C Block 70 ចំនួន ៤គ្រឿង, F-16 D Block 70 ចំនួន៤គ្រឿង ព្រមទាំងម៉ាស៉ីន១១គ្រឿង ហើយនិងឧបករណ៍ផ្សេងៗទៀត សម្រាប់យន្តហោះចម្បាំងទាំងនេះ៕
