យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានបាញ់បង្ហោះបាឡុងសំរាមប្រហែល ១២០បាឡុងទៅកាន់ប្រទេសកូរ៉េខាងត្បូងកាលពីព្រឹកថ្ងៃចន្ទ បន្ទាប់ពីការបាញ់បង្ហោះស្រដៀងគ្នាកាលពីសប្តាហ៍មុន។
អគ្គសេនាធិការចម្រុះ បាននិយាយថា ខ្លួនបានរកឃើញកញ្ចប់សំរាមចំនួន ៨០កញ្ចប់ ដែលត្រូវបានទម្លាក់នៅជុំវិញផ្នែកខ្លះនៃទីក្រុងសេអ៊ូល និងជុំវិញខេត្តយ៉ុងជី បន្ទាប់ពីការបាញ់បង្ហោះចុងក្រោយបំផុតដែលបានចាប់ផ្តើមនៅពេលព្រឹកព្រលឹម។
អគ្គសេនាធិការចម្រុះ បាននិយាយថា កញ្ចប់នោះមានសំរាមក្នុងផ្ទះដូចជាក្រដាស ថង់ប្លាស្ទិក និងដបប្លាស្ទិក ដែលមិនមានសារធាតុគ្រោះថ្នាក់ត្រូវបានគេរកឃើញនោះទេ។
ចាប់តាំងពីចុងខែឧសភា មក ប្រទេសកូរ៉េខាងជើងបានបញ្ជូនបាឡុងសំរាមជាង ៥.០០០បាឡុងឆ្លងកាត់ព្រំដែនឆ្ពោះទៅកាន់ប្រទេសកូរ៉េខាងត្បូងជាង ២៥លើក។
នៅក្នុងការបាញ់បង្ហោះរបស់ខ្លួនកាលពីថ្ងៃសុក្រ ប្រទេសកូរ៉េខាងជើងបានបញ្ជូនបាឡុងចំនួន ៣២០បាឡុង។ យោធាកូរ៉េខាងត្បូងបានប្តេជ្ញាថានឹងចាត់វិធានការយោធា «យ៉ាងតឹងរ៉ឹង» ប្រសិនបើប្រទេសកូរ៉េខាងជើង «ឆ្លងកាត់» ជាមួយនឹងយុទ្ធនាការសំរាមដែលកំពុងបន្តរបស់ខ្លួន ឬធ្វើឱ្យខូចខាតយ៉ាងធ្ងន់ធ្ងរដល់ប្រជាជនកូរ៉េខាងត្បូង។
ជាការឆ្លើយតបទៅនឹងការបាញ់បង្ហោះបាឡុង យោធាកូរ៉េខាងត្បូងបាននឹងកំពុងធ្វើការផ្សាយឃោសនាប្រឆាំងនឹងកូរ៉េខាងជើងជារៀងរាល់ថ្ងៃតាមរយៈឧបករណ៍បំពងសំឡេងនៅតាមព្រំដែនចាប់តាំងពីថ្ងៃទី២១ ខែកក្កដា។ ខ្លួនបានបដិសេធមិនបាញ់ទម្លាក់បាឡុងដោយផ្ទាល់នោះទេ ព្រោះតែមានការព្រួយបារម្ភអំពីសុវត្ថិភាព៕
ប្រភព៖ ក្រសួងព័ត៌មាន
