ឯកឧត្ដម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជាមានប្រសាសន៍ថា ការចាប់ផ្តើមនៃកិច្ចសហប្រតិបត្តិការមេគង្គ-ឡានឆាង នៅទីក្រុងសាន់យ៉ា ឆ្នាំ២០១៦ បានឆ្លុះបញ្ចាំងអំពីបំណងប្រាថ្នារួមរបស់ថ្នាក់ដឹកនាំនៃប្រទេសសមាជិកមេគង្គ-ឡានឆាងទាំងប្រាំមួយ ក្នុងការលើកកម្ពស់ សន្តិភាព ស្ថិរភាព និងការអភិវឌ្ឍលើគ្រប់វិស័យ ក៏ដូចជាការកសាងសហគមន៍មួយដែលមានអនាគតរួម គ្នានៃសន្តិភាព និងវិបុលភាពសម្រាប់ប្រជាជនក្នុងតំបន់ និងពិភពលោក។ ទោះបីជាមានការប្រែប្រួលនៃសភាពការណ៍ពិភពលោកមិនប្រាកដប្រជា អស្ថិរភាព និងភាពស្មុគស្មាញយ៉ាងណាក្តី ក៏ក្របខ័ណ្ឌកិច្ចសហប្រតិបត្តិការមេគង្គ-ឡានឆាង បានបន្តរក្សាភាពរីកចម្រើននៅលើគន្លងការអភិវឌ្ឍជាក់ស្តែង។
ក្នុងសារលិខិតអបអរសាទរក្នុងឱកាសខួបអនុស្សាវរីយ៍លើកទី៨ នៃកិច្ចសហប្រតិបត្តិការ មេគង្គ-ឡានឆាង និងទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាងឆ្នាំ២០២៤ ពីថ្ងៃទី១៨ ដល់២៤ ខែមីនា ឆ្នាំ២០២៤ ឯកឧត្តម សុខ ចិន្តាសោភា បានថ្លែងថា រយៈពេលប្រាំបីឆ្នាំកន្លងមកនេះ យន្តការមេគង្គ-ឡានឆាង បាននិងកំពុងឆ្ពោះទៅមុខ ហើយក្លាយទៅជាគំរូនៃកិច្ចសហប្រតិបត្តិការឈ្នះ-ឈ្នះ ដ៏មានប្រសិទ្ធភាព ផ្តល់នូវវឌ្ឍនភាពគួរឱ្យកត់សម្គាល់ និងបង្កើនកិច្ចសហការគ្នា។ យន្តការនេះ ក៏បានជំរុញកំណើនថ្មីសម្រាប់រយៈពេលវែង និងការអភិវឌ្ឍប្រកបដោយនិរន្តរភាពរបស់តំបន់ ជាពិសេសតាម រយៈការអនុវត្តប្រកបដោយជោគជ័យនៃផែនការសកម្មភាពប្រាំឆ្នាំនៃកិច្ចសហប្រតិបត្តិការមេគង្គ-ឡានឆាង(២០១៨-២០២២)ដែលបានផ្តល់លទ្ធផលជាផ្លែផ្កាសម្រាប់សុខុមាលភាពរបស់ប្រជាជនយើង។
ឯកឧត្ដមឧបនាយករដ្ឋមន្រ្ដីបានលើកឡើងថា នៅក្នុងកិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាងលើកទី៤ កាលពីខែធ្នូ ឆ្នាំ២០២៣ ប្រមុខរដ្ឋាភិបាលរបស់យើងបានអនុម័ត “សេចក្តីថ្លែងការណ៍ទីក្រុងណៃពិដោ”។ នៅក្នុងការឯកភាពគ្នាជំរុញខ្សែក្រវាត់អភិវឌ្ឍន៍សេដ្ឋកិច្ចមេគង្គ-ឡានឆាង ប្រមុខដឹកនាំទាំងអស់បានគូសបញ្ជាក់ពីតម្រូវការនៅក្នុងការចាប់យកឱកាសក្នុងវិស័យវិទ្យាសាស្ត្រ បច្ចេកវិទ្យា និងឧស្សាហកម្ម។ ទន្ទឹមនេះ ថ្នាក់ដឹកនាំ ក៏បានឯកភាពសហការគ្នាក្នុងវិស័យថាមពលថ្មីៗ ដូចជារថយន្តអគ្គិសនី ថាមពលពន្លឺព្រះអាទិត្យ និងសំឡឹងមើលវេទិកាព័ត៌មានមេគង្គ-ឡានឆាងគ្រប់ជ្រុងជ្រោយសម្រាប់សេដ្ឋកិច្ចកសិកម្ម វិនិយោគ និងបច្ចេកវិទ្យា។ ថ្នាក់ដឹកនាំក៏បានអនុម័ត “ផែនការសកម្មភាពប្រាំឆ្នាំថ្មី (២០២៣-២០២៧)” ដែលរួមមានការស្វែងរកគំរូថ្មី សម្រាប់កិច្ចសហប្រតិបត្តិការទេសចរណ៍។
ឯកឧត្ដមឧបនាយករដ្ឋមន្ត្រីគូសបញ្ជាក់ថា ក្នុងនាមជាផ្នែកនៃកិច្ចខិតខំប្រឹងប្រែង ដើម្បីឱ្យយុវជនចូលរួមនៅ ក្នុងគំរូថ្មីនៃការធ្វើដំណើរតាមរយៈវេទិកាផ្សេងៗ ប្រទេសកម្ពុជាកំពុងបើកដំណើរការគេហទំព័រឯកអគ្គរដ្ឋទូតទេសចរណ៍មេគង្គ-ឡានឆាង ដែលនេះគឺជាការទទួលស្គាល់សមត្ថភាពរបស់យុវជនក្នុងការសម្របខ្លួនទៅ នឹងបច្ចេកវិទ្យា និងការផ្លាស់ប្តូរឌីជីថលយ៉ាងងាយស្រួល។ ឯកសារទី៣ ដែលបានអនុម័តគឺ “គំនិតផ្តួចផ្តើមរួមគ្នាលើការអភិវឌ្ឍច្រករបៀងនវានុវត្តន៍កិច្ចសហប្រតិបត្តិ ការមេគង្គ-ឡានឆាង” ដែលមានគោលបំណងធ្វើឱ្យប្រសើរឡើងនូវកិច្ចសហប្រតិបត្តិការក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍។ វិស័យផ្សេងទៀតដែលគ្របដណ្តប់រាប់ពីការកាត់បន្ថយភាពក្រីក្រការអភិវឌ្ឍ ឧស្សាហកម្ម និងសុខភាពសាធារណៈ រហូតដល់បច្ចេកវិទ្យាឌីជីថល និងបច្ចេកវិទ្យាបៃតង និងភាពជាសហគ្រិន រួមទាំងបរិយាកាសសម្រាប់ការចាប់ផ្តើមអាជីវកម្ម។ នៅកម្ពុជា ស្ថាប័នទទួលបន្ទុកការអភិវឌ្ឍ ច្រករបៀងនវានុវត្តន៍នៅទូទាំងតំបន់មេគង្គ-ឡានឆាង គឺក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍។
ឯកឧត្ដមបានគូសបញ្ជាក់ទៀតថា មូលនិធិពិសេសនៃកិច្ចសហប្រតិបត្តិការមេគង្គ-ឡានឆាង នៅតែជាឧបករណ៍ហិរញ្ញប្បទានដ៏សំខាន់សម្រាប់ ការអនុវត្តគម្រោងកិច្ចសហប្រតិបត្តិការថ្មី លើវិស័យអភិវឌ្ឍន៍ជនបទ ការកាត់បន្ថយភាពក្រីក្រ ធនធានទឹក កសិកម្ម ការដឹកជញ្ជូនផ្លូវអាកាស សុខាភិបាល អប់រំ ទេសចរណ៍ វប្បធម៌ និងការពង្រឹងសិទ្ធិអំណាចរបស់ស្ត្រី។
ឯកឧត្ដមឧបនាយករដ្ឋមន្រ្ដីក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជននៃសាធារណរដ្ឋ ប្រជាមានិតចិនដែលបានផ្តល់ការគាំទ្រ និងចូលរួមយ៉ាងសកម្មក្នុងការជំរុញក្របខ័ណ្ឌនៃកិច្ចសហប្រតិបត្តិ ការមេគង្គ-ឡានឆាង។ កិច្ចសហប្រតិបត្តិការមេគង្គ-ឡានឆាង នឹងបន្តបម្រើជាមធ្យោបាយវិជ្ជមានជាមួយនឹងយន្តការអនុតំបន់មេគង្គ ដទៃទៀត ក្នុងការបំពេញបន្ថែមឱ្យគ្នាទៅវិញទៅមកជាមួយ “ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់” ក៏ដូចជា “គំនិតផ្តួចផ្តើមខ្សែក្រវាត់ និងផ្លូវ (BRI)” “គំនិតផ្តួចផ្តើមអភិវឌ្ឍន៍សកល (GDI)” “គំនិតផ្តួចផ្តើម ផ្នែកសន្តិសុខសកល (GSI)” “គំនិតផ្តួចផ្តើមអរិយធម៌សកល (GCI)” និង “គំនិតផ្តួចផ្តើមអភិបាលកិច្ច បញ្ញាសិប្បនិម្មិតសកល” របស់ចិន។ យន្តការទាំងនេះ ត្រូវបានបង្កើតឡើងដើម្បីលើកកម្ពស់បន្ថែមទៀតនូវកំណើនប្រកបដោយបរិយាបន្ន និងការអភិវឌ្ឍសេដ្ឋកិច្ចឌីជីថល ហើយជំរុញឆ្ពោះទៅមុខនូវសមាហរណកម្ម អនុតំបន់ដែលរួមចំណែកដល់កិច្ចខិតខំប្រឹងប្រែងកសាងសហគមន៍អាស៊ាន។
ឯកឧត្ដមប្រមុខការទូតកម្ពុជា មានជំនឿយ៉ាងមុតមាំថាក្របខ័ណ្ឌកិច្ចសហប្រតិបត្តិការមេគង្គ-ឡានឆាង នឹងបន្តគាំទ្រដល់សហគមន៍ នៃអនាគតរួមគ្នា នាំមកនូវវិបុលភាពសម្រាប់ប្រជាជនគ្រប់រូប ដែលជាការអភិវឌ្ឍដ៏ជោគជ័យសម្រាប់តំបន់ មេគង្គ-ឡានឆាង៕
ប្រភព៖ ក្រសួងព័ត៌មាន
