រដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ បាននិយាយកាលពីថ្ងៃអង្គារថា លោកនឹងពិភាក្សាអំពីស្ថានភាពនៅឧបទ្វីបកូរ៉េជាមួយរដ្ឋមន្ត្រីការបរទេសកូរ៉េខាងជើង លោកស្រី ចូ ស៊ុនហ៊ុយ។
លោក ឡាវរ៉ូវ បាននិយាយនៅក្នុងកិច្ចប្រជុំមួយជាមួយសមភាគីកូរ៉េខាងជើងរបស់លោកថា «សម្រាប់របៀបវារៈអន្តរជាតិ ពិតណាស់ យើងចង់បន្តកិច្ចសន្ទនាជាសម្ងាត់របស់យើងអំពីស្ថានភាពនៅលើឧបទ្វីបកូរ៉េ និងនៅក្នុងតំបន់អាស៊ីឦសាន»។
លោករដ្ឋមន្ត្រីបាននិយាយថា ប្រទេសរុស្ស៊ីបញ្ជាក់ជំហរជាគោលការណ៍របស់ខ្លួនឡើងវិញក្នុងការពេញចិត្តចំពោះការដោះស្រាយដ៏ទូលំទូលាយ និងត្រឹមត្រូវនៃបញ្ហាដែលមានស្រាប់នៅលើឧបទ្វីបនេះ។
រដ្ឋមន្ត្រីការបរទេសកូរ៉េខាងជើង លោកស្រី ចូ ស៊ុនហ៊ុយ បាននិយាយកាលពីថ្ងៃអង្គារថា ប្រធានាធិបតីរុស្ស៊ី លោក វ៉្លាឌីមៀ ពូទីន ត្រូវបានអញ្ជើញឱ្យទៅបំពេញទស្សនកិច្ចនៅកូរ៉េខាងជើង ហើយទីក្រុងព្យុងយ៉ាងសង្ឃឹមថានឹងបង្កើនការផ្លាស់ប្តូរគណៈប្រតិភូជាន់ខ្ពស់ជាមួយរុស្ស៊ីនៅក្នុងឆ្នាំ២០២៤។
រដ្ឋមន្ត្រីរូបនេះបាននិយាយបន្ថែមថា ប្រទេសកូរ៉េខាងជើងនឹងខិតខំប្រឹងប្រែងដើម្បីអភិវឌ្ឍទំនាក់ទំនងជាមួយរុស្ស៊ី៕
ប្រភព៖ ក្រសួងព័ត៌មាន
